Daar is verskriklik baie woorde om my familie te beskryf. Dof is beslis nie een van hulle nie. Nou dat ek daar aan dink, normaal ook nie. Wanneer ek van my familie praat, praat ek nie net van my ma, pa, ouer broer of jonger suster nie. Nee, ek praat ook van my ouma, ooms, tannies, neefs en niggies, die hele spul!
Ons is 'n vier generasie familie. Wanneer ons almal besluit om saam te kuier, is niemand se huis groot genoeg nie. Gelukkig staan dit nooit in ons pad nie. Alhoewel ons 'n groot familie is, is ons baie geheg aan mekaar. Ons is daar om mekaar te motiveer en te ondersteun.
Ons is die soort familie wat kostuum en tema partytjies hou. Ons kamp saam, gaan saam uit, lag saam, huil saam, ons doen alles saam! Vir 'n buitestaander lyk ons seker gek! Ons familie samekoms is altyd luidrigtig en chaoties. Tien mense kan tien verskillende gesprekke hou en almal sal weet wat aangaan.
Danksy my familie is ek die persoon wie ek is vandag. Ek is 'n bietjie gek, maar ook 'n bietjie erenstig. Ek is eienaardig, maar ek ken my perke. Net soos my familie is ek so 'n bietjie van my trollie af.
